A casa dos grandes pensadores

Bem-vindo ao site dos pensadores!!!

| Principal |  Autores | Construtor |Textos | Fale conosco CadastroBusca no site |Termos de uso | Ajuda |
 
 
 

 

 
Poema
 
VERSOS EM LINGUA IBINDA
Por: Joaquim Mbatchi

PREFÁCIO

Esta pequena colecção de textos em Ibinda é um trabalho que serve de apoio à gramática da mesma língua, destinada aos alunos do Complexo Escolar Privado Chengenene.
Isto é resultado dum esforço particular para responder às exigências da presente época em que estamos todos chamados a conhecer e falar, sem vergonha, a língua da nossa região, porque nela reside a nossa identidade cultural. Nunca é tarde para aprender e, conhecer mais uma língua na vida é sempre bom; pois, dizia Eça de Queirós que “cada pessoa deve falar com perfeição e impecável correcção a língua da sua terra porque é na língua onde reside a identidade de um povo”. Se os nossos ancestrais já o falavam porque teremos nós receio de nos exprimir na língua que melhor nos identifica?
“Wonsoko muntu mu mbembu kizabangenanga mvila vo liko...” Muitos ainda questionam porque aprender e falar uma língua que não tem escritos, que não se expande? É falando que ela deve expandir-se cada vez mais além das nossas fronteiras. Ontem não teve escritos porque os nossos antepassados eram povos sem escrita; entretanto, com a expansão da civilização ocidental em África, nós os falantes do Ibinda decidimos levar ao conhecimento de muitos essa nossa grande identidade cultural e, estamos certos que como os colonizadores portugueses não foram capazes de eliminar o Ibinda das nossas comunidades essa língua jamais desaparecerá do nosso território conforme desapareceram as línguas vernáculas dos brasileiros, dos norte americanos, dos mexicanos e de tantos outros povos colonizados. Tal como os belgas que não se esqueceram do seu walon e flamengo também os cabindenses continuarão a falar o Ibinda até à eternidade.


O autor, JOMBA





XXXXXXXXXXX
XXXXXXXXXXX
XXXXXXXXXXX
XXXXXXXXXXX
XXXXXXXXXXX









MBAZU LUSINGU

Minu ilota ndose, ilumbu cimweka
Ti ikúndama ngonda mu mpaka;
Kucimweka i nuni mweka imáka
Bwinji uvana lutumu ke batyamuka,
Ke bakambu ibila bakala mu ivíka
Mu ibila ci bana bitwalisa yaluka-yaluka
I makambu fwana manka.

Iyála myoko mun’ulinda ke ntangu`nsika
Kazai, nandi ufila mbazu ikwenga
Bwinji uviika bangu lunangu i bavuvuka,
Zinganga zyonso zibiiva zitula ibáka,
Ozyo zibunga bantu m’ucyenga ubaka
Mu bwivi i bumpunya kucimweka
Mu nkama nkola, bwinji babonso uvyoka.

Cabinda, 2 de Janeiro 2002
MBIZI CIMVUNZI






XXXXXXXXXXX
XXXXXXXXXXX
XXXXXXXXXXX
XXXXXXXXXXX
XXXXXXXXXXX




BUYILA

Bwisi buyila,
Itombe cinkoba;
Ikwíndika meso
Vanji cisimona cimvele ko
Ibila bwisi buyila!

Bwisi buyila,
Imána bâ dede i mpofo
Ina ilúza meso i ngenze mwinya
Bwinji kamona mana mivyoka,
Vanji wimanga umona cimvele
Ibila, mu nandi, kete tyemwene,
Bwisi buyila!

Bwisi buyila,
Ibila tuti linomba;
Tuti linomba livubalele Cyowa;
Mvula ikwelikesa ubíngulwa
Kaza, ni libete cisilimona ko
Ibila bwisi buyila!

Bwisi buyila,
I ngenze mwinya itombe
Mu meso mami pipila mukele,
I kuna nganda lyufa ni butubila!
Lupépemu lu mvula luvetamoka,
Vanji bakisi bikanda i bibîndika
Ibila bwisi buyila!

Bwisi buyila,
Itombe cinkoba,
Ke i lieso nkindibili;
Vanji cyezila cimebelama;
Mvula imebingulwa
Yono welanoka
I bwisi bwelacya.

Cabinda, 14-12-2004
MBIZI CIMVUNZI






XXXXXXXXXXX
XXXXXXXXXXX
XXXXXXXXXXX
XXXXXXXXXXX
XXXXXXXXXXX


LUVAMBANU

Muntu kafwanga bobo ko…
Kete ku `nsitu, kete mu ntandu kele
Njye fwene usúsukwa
Ti kabikizi `mvele ko
Mu mpasi ku bwala.

Muna mafula ma bwala
Fwili, fwili dindi…
Kuna kati ku bwala zingunga i zinkoko
Zyekitátangana:
Dlim dlom, dlim dlom…
Bam’didi `ntu, bam’didi `ntu,
“Wenda kwaku njye veka ikundubulu cintu.”

Usalu bi `nsitu bifwili,
Tulala twekityakalangana,
Bantu bakábukwizi
Muna ke tyamunanga sangu mpasi:

Cingandi nonukweze,
Cingandi cetikeze luto,
Cingandi dasukwizi
Wendeze kwandi naku kanina.

Likanda i bakundi basyele mu cyunda
Cyunda ocyo cizimukwina
Muna maswela ayi inkûnga
Ivanga ubutu ubosomoka.

Kete mu cimbevo, kete mu nzala,
Kete mu nzimbala zyandi naveka
Kafwilili,
Ah buna! Vana kanda
Vabika bemonika ciboba.

Zinganga zimetambula lubakala,
Bana baku-kuswanga bekikuswa,
Zinguli zinkazi zyekitóvukwa
Mavenda kanikito be telama.

Ba nkolokoto meso meki venukwa,
Mekivenukwena muna ikuta,
`Mfwizi `ncyento i baana bolil’oko…
Bazimbangene ti nzila lândana.

Bazimbangene ti ku kangala tuyíza,
I abu twelavyokilanga kuna mabumba
Tebukwanga monyo,
Ibila `ntoto awu ndelo, ndelo!

Cabinda, 08-06-2007
MBIZI CIMVUNZI





XXXXXXXXXXX
XXXXXXXXXXX
XXXXXXXXXXX
XXXXXXXXXXX
XXXXXXXXXXX



CYOWA

Vana ntete njye uba citanda
Citanda ci basi bwala,
Nganda bwinji tandilanga byuma,
Byuma bincinzi luzingu
Bikilanga bene ukwánga, mayaka,
Mafuta, inkandi, zi-mbala,
I binka bina biliwanga.

Weka bwete lizíngila wombo makanda,
Bubu aci kasyele citanda ko.
Cyowa bwete li basi Ngoyo,
Lizingila sambwali li mvila;
Baana ba Makongo, Mangoyo i Malwangu:
Bawoyo, bakwakongo, balinji, bakoce,
Bavili, bayombe i basundi.

Cyowa bwete liyenda mpúmu
Bwala bucyo bulikila nza imvimba
Basi Afrika, basi Mputu i basi Merika,
Obo bikota i bibasika.
Cyowa mam’itu,
Mam’itu luzolo, vanji bubu
Cimána citukwa nzungu vola.

22-06-2007
MBIZI CIMVUNZI



XXXXXXXXXXX
XXXXXXXXXXX
XXXXXXXXXXX
XXXXXXXXXXX
XXXXXXXXXXX




Lizandu

- Kunsi wikwenda?
- Ku zandu ikwenda.
- Ncya wekasumba kwawu?
- Bilya yekasumba.
- Mpila bilya mbisi weka sumba?
- Madezo, loso, mafuta i mbizi.
- Njye zabizi ulamba?
- Bawombo bikwiza kulyanga ku nzo ami.
- Buna, ku ndundila ndonga wali zi madezo.
- Malavu ivandi makele, kúbika to pakiti.

22-06-2007
MBIZI CIMVUNZI





XXXXXXXXXXX
XXXXXXXXXXX
XXXXXXXXXXX
XXXXXXXXXXX
XXXXXXXXXXX

ITOKO CI MESO

Rosa ileze-cyento cimasimananga
Ci kumi imvu tanu;
Mwana inlatu wali
Babika ke lukezu, kuna Malembo;
Ileze-cyento cikele pelele,
Cyacyonso demvo-demvo.

Rosa ubutukwa monanga mundele,
Cyowa cyonso vakele k’ono
Widedangana yandi.
Itóko tona mu malu
Yeke zitikila ku ndunzi.

Rosa tindi lilezama,
Lilezama monanga ntangu
Vakele k’ono limanga kunlengula
Ono limanga kuncebula
Mu nzila zyonso kivyokila.
Rosa cilepepe,
Iteka cimfimbu
Cibika ubákalana mu cintatu.

Rosa `nkwa itoko lendeze usala
Mwana bwala zimbele ulamba;
Kwaveka lulendu, kwaveka `nlevo!
Isalu cyandi to itoko,
Ucina, ukangala.
Ukangala, aku bwete, ayi banene
Bana bimvaatikila i bim’bobomona
M’uzwanana b’itombe,
Muna kitambwila `mpifu saka-mbisu
I kamadamvemena`nsongo mbandu.

Rosa itoko cimeso,
Monanga kwandi libumba
Lina bafíkula bubote ku nganda
Vanji liwele seka muna kati;
Masákanina ngolo luzingu
Abubu bakundi bonso bamakuntiina,
Ibila Rosa kasyele `mvingu ko
Kasyele ko livimbu i wekasyokanga
Monang’ono mavanga
Ngonda imvimba naku lya.
Masyala nawonso `mvese i `mvese.
Bodo uba `nlele…

Cabinda, 06-12-2007
MBIZI CIMVUNZI




XXXXXXXXXXX
XXXXXXXXXXX
XXXXXXXXXXX
XXXXXXXXXXX
XXXXXXXXXXX


KETINISANGA MONYO

Talabu inanu ifuma
Muna kizilyanta nzila sende,
Ku si mînya ngolo i zimvula;
Kwaveka mpemu, kwaveka nzazi.

Kumi imvu tanu muna kedwekanga
Mu nzila oyo kambangene ínti,
Kwaveka intambu malu
Kwaveka mpunya
Ozyo zizungana ibwilu i mwinya.

Ketinanga muna ukakila monyo,
Njyeke zaba bubote oko wikwenda,
Kuna wifuma zabizi;
Indúma yawu ilaanda kumbusa
Omo wivyokila, banka búna babindalele,
Oko basélelele monanga nkanda songolo.

Njye `nkutu, nani wikamba ti telama!
`Ntima wonso lumbámbazu
Meso pánana;
Kwaveka lufumfu, kwaveka cyoze,
Nzala buna zímbala.

Nzila yonso ko kesambanga
Nzambi mbaka cyali
Zezu, Maria, José beno to ifyete,
Kanikito ku mbika
Ubwa mu myoko zimbene.

Butukwila mu `mvita
Konzukwela mu`nzingu,
Zíngila mu mpasi…
Luzingu alu lwamana
Nzambi mpana liyilu lyaku.

Cabinda, 06-12-2007
MBIZI CIMVUNZI






XXXXXXXXXXX
XXXXXXXXXXX
XXXXXXXXXXX
XXXXXXXXXXX
XXXXXXXXXXX






`NCYENTO BWALA

Vana `ncesele bwisi, kuna bwala
`Ncyento kamana kotukwa,
Ubása i zibola zinene
Byeka mu myoko.

Kuna kati ku nzo,
`nnuni i baana búna banónukweze
Búna bamene kuyikómpeleka mavunga
Mu ibila ci cyoze ci isívu.

Kuna nganda `mbunji,
Muna uzízila bimalu
Bími ni butubila
Oko bikóbisa `nlele,
`Nlele ono wivutukwila
Mu bincesele bimalu.

Nkama cyoze, nkama `mbunji
Nandi kafwene kenengumoka
Ketulumukanga mongo Ibeze
Muna kelanda mazi
Mazi masalila ku nzo.

Vana uvutukwa kwaveka lémina,
Kwaveka `ntivu!
Vana utampukwa kwaveka lyufa!
Kete syeze yobila
Idufu cibeze vutukwila.

Búna to kavitili ku nzo
Kanikito uzinga myoko.
Zindonga i zinzungu zyekisúkukwa
Makusa i nganda bikombweze.

`Nnuni bevyokilanga kuna ikozo
Macyo i zimpinda bikangwizi
Mayimbi mabele kókwanga
Kitemena to bantumisa
Bwinji kecefuna.


Cabinda, 06-12-2007
MBIZI CIMVUNZI




Linkambi-linkambi, nkambika:

1. Nzo ivanga manzampungu kunzi limweka to.
2. Baana ba manzampungu babutukwa ayi mankoma mafunda.
3. Kete mfumu yawu ivyokil’ovo nandi búna kabólelele.
4. Imwímwila cibasikila kusi matombe.



XXXXXXXXXXX
XXXXXXXXXXX
XXXXXXXXXXX
XXXXXXXXXXX
XXXXXXXXXXX




KUNSI USWAMINA?

Mamwene `mvanji liyilu;
Minukwawu va ndunzi aku
Imekwiza i cyiami izitu
I mami mambu.

Imekwiza ulinda `nlemvo
`Nlemvo wu mpasi zi nzingulu
Ozyo inata ava `ntoto masumu,
Zimpasi z’ilunzi i zi nyitu.

Ntambula muna luzolo lwaku,
Ibila ivami nke ivangu cyaku
Monanga wonsoko muntu
Ono kele lyela i cibuntu.

Binkufi beene byami ulumbu;
Tikwiza i tivyoka ntinu-ntinu
Dede ivúku ci mpemu `mbu
Cináta ndendekete bavubi i myatu.

Wiza nsalisa, minu mwan’aku
Muna byami ulílu i byanu,
Ibwilu i mwinya mu `nsitu
Mun’ibila ci `nzingu nsi-itu.

Zinkaka i zinkomba zyami, talabu
Zimemána ufwa mu cimbevo,
Mu nzala i mpwila va kati ku ntandu
Dede cimpongo cibúnganga zisusu.

Likanda li Cabinda, talabu kwaku
Lyeka zimbalanga mun’ibila ci lukuku
Lyeka búngananga mu cyunda ci mambu
Mun’ibila ci mambu ma nsi i ma luzingu.

Talabu cingamba muna ndima i mavutu
Ma banani batutóvulwa beene nyitu,
Mun’ibila ci saka, inkandi i mabumvu
Bwinji baana uvyocisela ilumbu.

Bizyami bi Kimbyanga, vana itó cinsitu
Muna nkama mabumba i makumatanu,
Mwamuna tuvangila i zinkomba zitu
Luvambanu lucyunda ci ivundu cyawu.

Kimbyanga, 19-05-1990
MBIZI CIMVUNZI






XXXXXXXXXXX
XXXXXXXXXXX
XXXXXXXXXXX
XXXXXXXXXXX
XXXXXXXXXXX




BUNGU LIFWANA

Bwala bwami minu,
Butonina kuna ntandu
Kuna ntandu Bungu
Mu ntangu bakulu;
Buvyokila kuna Ndeeku
Ndeeku zi utuba matungu,
Vanji bungu lyelafwan’amu
Amu ntandu ayi yitu.

Bwala bwami minu,
Banani batola bwawu?
Náni yandi muna bakulu
Ono utola Sintu i Libungu?
Ti na Chita ci Bwetete;
Ti na Njunku moonyo ibubu
Na Mpila ayi Bwetete, ivawu
Kana bawu bake bumonyo, yuwanu,
Nkanu yesikúvulabu;
Vanji nzabizi ti kuna Njyembo
`Nkuluntu Mangúmbu.

Kuna bwala bwami minu,
Kusyala ko bakuluntu
Ibila bayenda kwawu
Bayenda babonso ku zú,
I banka basábuka Jubungu.

Kuna bwala bwami minu,
Banmose bana babutukwila kwawu
Bamána tina Libungu i Sintu
Bákana to mu ibila ci `mvita;
Ku bwala mavada wombo, kebanu
Cimbene, `nsoce i mankundu,
kukana-kukana ayi `ntengo
Kuna bwala bwami minu,
Batende bonso, talabu kwinu
Basyele luzitu ko muna ntubulu;
Mambu bilubukwila mbuta vwadangu,
Utúmpula zisunga zingolo i malavu;
Bantu bilóngila mu tutangu
Bisi cínzika ko lilonje li Mfumu;
Bilándangana kwawu ibubu
Mavanga ma nza i zimpukumuku.

Kuna bwala bwami minu,
Bábana bawu bamána cítukwa íntu
Muna ulyasa nsi i bantu;
I bantete bawu, ibwilu
Bikúma banka insoongo, kebanu
Bilókila mu bifutukubu,
Bilékila balyawu tupanzu
Bidoomva nsi mu luvunu
Bivwanjika zimpofo va vangu.


Bwala bwami minu,
Bumána cítukwa `nsitu
`Nsitu ukambu mboma, monanu
Vuutu liliila zisibizi i memvo,
Ilála ci kolo-mbungu.
Muntu limonyo kazu,
Kazu li ubukuta kubwilu,
Busyala bwala ko buna butuungu
Vanji bumána citukwa cimpangulu.

Cabinda, 01-06-2002
MBIZI CIMVUNZI





XXXXXXXXXXX
XXXXXXXXXXX
XXXXXXXXXXX
XXXXXXXXXXX
XXXXXXXXXXX



BA `NKANDI `MVIMBA

Vana ntete Nzambi uvanga
Uvanga kuna Éden libakala,
Libakala limweka licyelika
Libakalanga uveka.

Buveka, butuba `nkulu
Ucituka ndungu mu luvukulu;
Bwabuna, mu luvati lu bakala
Nzambi uvanga `ncyento
Bwinji mu lubundunu
Uvanga kuna Éden likanda.

Babakala bubu mu Afrika
Basyala ko mu cilwinga cimweka;
Mamweka momo ivandi bacyento
Obo bamána tambazyana ke zitata
Buna bitambazyananga libukusu
Vana syelo li malavu.

Babakala i bacyento ba bubu
Bitomba babonso ukúncika
Bilepepe i ubakalana kucimweka ;
`Mvele witomba fwa mbabu.

Vanji, muna maanga uvala ikeko,
Bacyento ba Cabinda, muna binlongo
Bipúkala ibwilu i mwinya, mu vooze
Bivandila babakala, bangu mbongo
Muna bawu maanga bekwela maveko
Ayi inswanya oyo bimona beene idóze.

Cabinda, 02.06.2002
MBIZI CIMVUNZI



`NTOTO `NKULUNTU

Mu `ntoto mwawu tufuma
`Ntoto wawu utulikila bya lumbu byonso.
Mu `ntoto mwawu mubasikila
Biwombo bina bituziingisa:
Mayaka, madezo, malolo, mânya,
Mafubu, zimpinda, zinkongo,
Zi-mbala, zingazi, uzánji i biwombo binka.
Muntu limonyo bwinji kaziinga,
Kafwene usimba libaka i sengo
Kafwene ufúdula `ntoto,
Ibila mwawu mubasikila
Usína bonso buzíngisa nza;
Nzetaloyi ivandi mu `ntoto ifuma.
Njye manga usala
Kabaka ko buziingila.
Mu nzo `nkanda kele
Cinda utanga bwinji ulubukwa,
Bwinji ubaka isalu;
Sala byaku wu baka,
Baka wu lya,
Lya wu ziinga,
Lembu ti byabyonso syala bisyala
Ibila `ntoto `nkuluntu.

Cabinda, 12-02-2008
MBIZI CIMVUNZI









XXXXXXXXXXX
XXXXXXXXXXX
XXXXXXXXXXX
XXXXXXXXXXX
XXXXXXXXXXX



LULENDO LUMASUMU

Koko ku Mfumu kukala `mvyungu ko muna ukakula;
Nandi kisi isílu ko bwinji kamanga ukúwa.
Masumu minu mawu masika liyenga
Lina likuluvasa beene ayi Nzambi.

Zimbivisu zinu zimevanga Nzambi uswama
Muna manga ku luvwilikila.
Myoko inu `mviindu menga kele,
Inlembo inu isumukwa.

Muna ulili binu bi munu luvunu wombo,
Muna tulimi twinu mbi zibasikila mwawu.
`Mvele wilosukwela busoonga,
`Mvele lifundisila muna bucyelika.

Litatimina kwinu luvunu,
Licicinina mana makambwizi mu nzila,
Likotisa cintatu i libutisa
Mana ma vúkila `nkanu `nnene.

Libutamena macyo ma nyoka zivondanga,
Litunga makonde ma mabuba;
Ono wilya macyo bene omo fwá,
Madézukwa, mpili zibasikila mwawu.

Muna makonde mawu
Mu podi tungamena binkutu ko.
Lu ifukikisa ko mu bina bitungamena mwawu.
Litwalisa mavanga ma sonya, …
Lifwika zinkoto zimbi…

Muna ibil’ocyo
Bwawu cyelika cikwakanena mu beno,
I bwawu limanga ubakila busoonga:
Litemena mwinda,
Kaza itombe to limona;
Litemena bwisi bucya,
Kaza ku itombe ibubu lilyatila.

Likwenda dede i mpofo
Muna ke bámbanga ubaka,
I-ngenza mwinya lidávama utuntu
I libwa ku itombe monanga bafwa.

Livaanga beno bonso dede ubulu binganzi,
Limima monanga mabembe.
Litemena ludedekoso,
Kaza, tomba lwawu umonika, ve;
Litemena lukuku
I lwau ibubu inanu lukele.

Isaías 59, 1-11
MBIZI CIMVUNZI






XXXXXXXXXXX
XXXXXXXXXXX
XXXXXXXXXXX
XXXXXXXXXXX
XXXXXXXXXXX


NANI UTUTOLOMONA?

Mwene Ibala Mamboma,
Mama Maliya Isiimbu Mambuku;
Tata Manuela Zoze Mpuna, …
Tata Manuela Bônzela Falanke…

Lembu ti lusá-tanga `nkanda `mvele ko
Beno luzaba ubuunda cintwali;
Luvanga mamviimba malúlama
Ayi mindele mputulukezu.

Beno lufwika mayindu macyelika
Luzaba uvyaka inlembo inu
Munkanda bwinji ulinda
Lubundunu lu nsi Cabinda i mindele.

Kuna simu li Mambuku,
Vana `nsina `nsanda
Luba bakutangana
Ayi mputulukezu.

Bwawabu, náni matubotula
Ku si lutumu lu lukezu eh eh!
Mbutu Cyowa mbisi
Uvuka mawomo eh?

`Mpúpulu ibaala,
Bincololo bamána yâla
Muna ukwiba, uvonda i teta
Amu nsi bakulu bitu.

Talabwanu menga ma mwana Cabinda
Mikumba dede i mwila;
Mu kati ku nsi-andi `mvika, mbizi,
Naku mbembu, naku `nkuli!

Ah tata Mikono eh eh,
Mbanda Ngó Bilolo,
Mambuku Mwene Mpuna;
Beno baana ba Malwangu,
Ba Mangoyo i ba Makongo eh eh!

Bulanu mbembu
Tukambanu filyambu
Vanganu mamviimba
Kana befo ukuuka kwitu!

Cabinda, 02-02-2001
MBIZI CIMVUNZI







XXXXXXXXXXX
XXXXXXXXXXX
XXXXXXXXXXX
XXXXXXXXXXX
XXXXXXXXXXX



MWANA USUMBULULA BANTU

Mbembu aku, Mwene, yawu mwinda i luzingu
Bilya b’ilúnzi ke bayá;
Bivyoka ku-ilenjya banene;
Kaza befo sangu aku `ncinzi tu ivwizi.

Mwisi Nazaré owo balélekeze va kulusu
Owo wilaanda insámuni mu nkonga bavubi,
Bangu bémbele, bankwá masumu
Nandi nzila, cyelika i luzingu.

Tukele bazimbala muna ketámbanga nza,
Tukele bazimbala k’itombe, befo ko nzila;
Mun’ibila ci vongata kwitu, tibala utelama.

Tilya mpanda i tibaanza befo bonso vamweka
`Ntinu `nsika owo likótulwa ku si lufwa
Balwelo bana bake lufyatu mu nandi.


Cabinda, 14-06-2001
MBIZI CIMVUNZI





XXXXXXXXXXX
XXXXXXXXXXX
XXXXXXXXXXX
XXXXXXXXXXX
XXXXXXXXXXX




Luzingu va kati ku Ntandu

Tubeele bincololo va mongo kuku
Ku mbusa makumaná mimvu
Va kati ku ntandu imweka inene
Vanani bawombo bitu babiika mavese
Vana ivandi banka babutukwila.

Va kati ku ntandu ikambu cimvele
Vana vaba to malundu i zimpalabanda,
Vavana vavíkila baana ba nsi
Dede i mameme makambulu `nsuunji.

Vanji, ti mabakanena `nsuunji ko
Nkanu mameme bene mamána ufwa.
Bavatola mu ilumbu cintanu
Ci ngonda kumi mu `mvu 1977.

Luzingu lu bantu limonyo
Vavovo lwesi tonina,
Mu insina zimpalabanda
Mu uzuka bi utiiti.

Ono ubaka ulembekela ku si mwanza
Ono ukambu mbota kabatanga ibwilu,
Minya ngolo kabavumvulwanga imwinya
I lyufa `nkutu, ni butubila!

Mu ikoza ci mpanza i `nkandi
Mwawu banka babavondilanga finyu;
Mu saka makwasa banmose bayónzukwela,
Mu bilya bi mazi bikambu zivitamina
Mwawu bantu babavyociselanga ilumbu.

Mamons’omo buna ti Ferreira Custódio
Nandi mfumu `nkangu.
Bakuluntu i ubábana badinda,
Badinda matama, malu i uvúvumu
Mu ibila ci mbela zi nzala.

Kwashorkor ibongomona monanga cimpongo
Kuna Bairro 15, uzu bu Maria Búku,
I Njimbi `Nlába,
Bisi mu lutangu ko bana basindila kwawu.
Muna ilumbu kevana kumi bilyomba.

Biboba i bikwindi, bikilanga beene,
Mu tukatu tunlomba bazyámina
Banmose mu insaansa twandu;
Cyali i cyunda mpila nyendulu ina.

Kuntwala Ferreira, kumonika
`Nlatu mweka, José António Bernardo;
Utumina mu ntangu nkufi
Bizi kumvínganena ke Zoze Baza,
`Nkuluntu mweka mwisi Mbutu,
Ubazingilanga kuna Bairro 3.

Bantu balyomba bawombo
Mu ntangu cintumu cyandi
Kala fyote cimvuka ci ONU cimonika
Bwinji udekula byanu ke nsi.

Bilya i ulongo bitona ukóta
Bawombo babíkana uvevelela
Kuna kusindila Mpila, Bwetete i Njunku.
Vanji Nzambi ubacyulila ntalu cyali.

Mu biterol ayi insimanji,
Mu fuba manya i loso
Makwela mavangana mawombo.
Bantu babweela ubutukwa.

Cimbyanga bwala bunene
bukábukwila mu kumi i `nsenje mweka,
Vanji zona wali ziba mwawu:
Zona norte i zona sul.

Kuntwala Zoze Baza
Kumonika cintumu cinka civíba,
Cina batwalisa ke bakala limweka,
Bakala li njibiti, João Kanga,
Ono usala i balyandi banka,
Anselmo Mbambi, João Mbatchi,
Pedro Cláver i tutanga tulembo.

Cabinda, 14-06-2015
MBIZI CIMVUNZI




XXXXXXXXXXX
XXXXXXXXXXX
XXXXXXXXXXX
XXXXXXXXXXX
XXXXXXXXXXX


Linkambi-linkambi, nkambika:

1. Nyenya mu lubala.
2. Ibanga civanga manzampungu naveka to fwene umaka vawu, muntu `nka tolomoka.
3. Nzo baviika isyala `nkambu mweka to.
4. Pitikilipyóm.

XXXXXXXXXXX
XXXXXXXXXXX
XXXXXXXXXXX
XXXXXXXXXXX
XXXXXXXXXXX

Ulongukwa Lyambu

Zinkaka zyami zyonso
Ku bwala zibutukwila
I zisazaba `nkanda `mvele ko
Ibila mu ntangu bayonzukwa
Kusaba nzo `nkanda ko.
Babutukwa mu ntangu
Nzo mpabika, mu ntangu
Mwinda `mbili.

Cyuma to balongukwa
Usiimba libaka i sengo
Ufúdula `ntoto
Usiimba nkoza i cimpiti
Zisava i bingundu
Bwinji umaka nsamba.

Bakulu bitu
Bazaba usonika ko,
Bazaba utanga ko
Vanji baba luzabu,
Luzabu lu cinkulu cyawu.
Utanga zimvila, uta zinongo,
Manguunga, uyola,
Usukula `nziimbu,
Ngolo baba
Muna mamons’omo.

Njye mabutukwa mu
Ntangu moona,
Mu ntangu luzabu lunkanda,
Yukulwila balyaku
Bana bilyata nzila inanu
Muna ketombanga luzabu
Muna kelongukwa
Mana matwala mundele.

Longukwa uluubukwa,
Lúbukwa bwinji usala;
Sala unanjika likanda,
Unanjika nsi i bantu.
Bika vukwila bana bekuseva
Mu ibila c’inama,
C’inama cyaku cinyitu cityuka;
Lekabu ti “biva ubiva,
Mpasyabu to uluubukwa”.

Livyokeze `ncinzi bákana ko
Meno mana bamvimba bikeneka,
Vanji lyela i luzabu lwaku,
Luna lubasikila mu mbuundu aku
Luna lwelakuvanga
Uba muntu tungu
Mu lumbu bintwala.

Ti wizola uba itwanya mu luzingu
Buna ntangu yayiyi;
Bika lembekela tolo,
Bika betala kumbusa,
Kotukwa! Telama wenda;
Wenda kuntwala,
Landangana nzila mwinda
Longukwa muna budede
Bwinji yono ubaka
Luzingu lunyenze i lunkembo.

Cabinda, 30 de Junho de 2019
MBIZI CIMVUNZI



XXXXXXXXXXX
XXXXXXXXXXX
XXXXXXXXXXX
XXXXXXXXXXX
XXXXXXXXXXX


Linkambi-linkambi, nkambika:

1. Mayaka mayinika ndoci mabombanga ko.
2. Aku `nkunka aku `nkunka va kati vawu bisasa nzawu.
3. Mwila uvanga manzampungu kobilela mu ndambu.
4. Nti wabibúndil’ava vanji `nkodo ukuwa ve.
5. Cyuma mbisi civyokeze ulyata mu nyitu muntu?






XXXXXXXXXXX
XXXXXXXXXXX
XXXXXXXXXXX
XXXXXXXXXXX
XXXXXXXXXXX



Lungundayi

Zimbangana monyo
Utuumbu bikáda mbazyaku
I bákana vanga limvele ko
Lina lilweka ilunzi
Vo nyitu muntu yaku.
Lunangu lyambu limbi bene
Ke Nzambi i ke bantu;
Ke babwali obo bumpunya `nkanu `nnene.

Mu ibila ci luvunu,
Ci bwivi i kambu ku busoonga
Bwawu bukúndubukwilanga
Bamvimba muna bintinu byawu.
Ibila mbisi muntu
Kafwene kuyikundilikila
Muna uzaba ti nandi
Muntoto kafuma
I mwawu kelavutukwa?

Nani-yandi mu bana
Bake bumonyo,
Ono wiziinga ayi inlyá
Imana bóla lumbu?
Mbela laamba yayina
Isévanga nganga `nkisi.
Bwabuna ivandi bubu,
Ti njye kele itwanya,
Yono podi kwaku ucetika luto.

Muntu kamana fwa,
Zifinyu zyawu zinlandulwanga
Kuna mabumba.

Nto lungundayi lu muntu
Ifwanangene ayi ono
Wileenda Nzambi,
Ono wibanda mbusa `mvanji andi;
Ibila ntonono lisumu lyonso
Ikele muna lunangu.

Ono wikwangalala mu lungundayi
Ílu kibandimina;
I, bututa `nkulu,
“Bandimina ílu mpeve zyaku
Uyibweela”.
Wekuyisíkila njye veka
Libulu muna welavindubuka.
`Mvanji byabyonso wikúndubulanga
Bangu lunangu i wivínjyanga
Mu bwangu byawu
Bangu bembele.

Lungundayi lusavangamena
Mu ibila ci bantu ko,
Ni nganzi mu ibila ci bana
Bibutukwila muna `ncyento.


Cabinda, 8 de Fevereiro de 2004
MBIZI CIMVUNZI


XXXXXXXXXXX
XXXXXXXXXXX
XXXXXXXXXXX
XXXXXXXXXXX
XXXXXXXXXXX



Linkambi-linkambi, nkambika:

1. Bingulubwana byole biyenda keyobila, vana unengamoka mongo bizaba, baka vavutukwa bikata bezaba utampuka mongo.
2. Ukwiza ntinu uvutukwa malembe-malembe.
3. Mindele i bafyote bayenda mumvita, mindele yonso imana ufwa.
4. Cikufi-kufi cipítumuna ndungu.
5. Mwila uvanga manzampungu cingola cimweka to.
6. Ntandu baviika isyala ulolo byole to.
7. Muntu uyenda kelanda nganga, nganga ntete va si.
8. Itendekele cinsoce manunga mwám.





XXXXXXXXXXX
XXXXXXXXXXX
XXXXXXXXXXX
XXXXXXXXXXX
XXXXXXXXXXX




Uzaba Uziinga

Bantu bitubilanga beene lyambu lisisi i libavananga beene booma mu ntangu zimevyoka, kati lufwa.
Ncya cyandi lufwa? Muntu wifwanga kwandi muna bucyelika? Bakele cyecyelika bana bizaba i bizimbila ufwa? Ncya cyandi uzimbala i uzaba ufwa? Ibila mbisi muntu kifwilanga?

Cyonsoko cina cimenanga, cyonsoko cina cibutukwanga, cyonsoko cina cike luzingu nkulukwilu ufwa mene ufwa masika. Muntu nani kakele? Muntu isangala civaanga Nzambi cikele nyitu i ilunzi cibala. Nyitu i ilunzi cibala byabyobyo bivanga muntu limonyo; ilunzi cibala cyacyocyo citula luvyakunu muna muntu ayi byabyonso binka bina bibutukwanga, bikilanga kwandi ubulu i mimpya-inti.

Lufwa ncya? Muna cinkulu citu bitubanga ti lufwa dede njye sili ti udoka, ulyomba, maanga beziinga, maanga bevumukwa, ulembekela tolo tumvu imvu, umána mbazu nyitu, uvola njye wonso, njyeke benyikukwa, njyeke besoonsa, njyeke belaba ni utuba. Ti muntu fwili buna zaba ti nyitu andi yonso ivoleze ibila ilunzi cimusyele ko. Mwela wakwákana mu nyitu buna zaba ti ono fizibanga muntu kasyele muntu ko, weka mvumbi, ivuvulu, weka cyuma cina cifwene maanga bekala itu vamweka, ibila bóbo kamadóka meso wekizibóla, wekizinuuka i, bwinji bana bisyala bumonyo maanga kuntabwila mata bafwene kumvangila mataanga yekenziika ku bizyami.

Lufwa lyambu lina `mvele kakupodi uvengukwa ava mongo `ntoto. Nzambi nabótula mwel’andi ono kafulwila ibumi cina kabumba, muntu wicitukwanga mvumbi, ibila Nzambi nandi mfumu luzingu i lufwa; vanji útwala lufwa va mongo `ntoto nkadi-mpemba. Muntu kifwilanga mu ibila ci masumu; bwawu bitubilanga ti lufwa mfutu `nkanu masumu. Cintinu ci lufwa ku uluunji cikele, kuna kuyalila mfumu luvunu.

Muna sangu moona mwawu timona ti Kristu unengamoka ku bafwa, kuna kalándila zisabi zi cintinu ci lufwa, kati mbene sinu ina katululwa muna lufwa i luvulubuku lwandi. (Rm 5,6-8).

Ncya cyandi uzaba i uzimbala ufwa?
Nkumbu ziwombo tiyindulanga lyambu bene ali litubikanga mafwinji i cyunda ciwombo muntima, kati lufwa. Bawombo bakele bana ibubu bakuvisiizi cintodi ci lufwa mu ibila ci kwatamena zinyenze zintoto; bakele ibubu bawombo bana bikwangalala i bizángila mu lufwa lu banmose, muna ucyenga kuyimonisa ti bawu makumbukutu, ti bawu bankolokoto; bawombo bakele bana bilándangana udocya banka m’uyimbu, mu likili, mu intambu bwilu i muna mavanga manka mana bazabizi bwinji ukúndubula i ukubula bana balendeze va mongo `ntoto. Zibula meso i yákana zimbene zinka zina zimana swamina ivandi mu mazwela vo muna lyambu li Nzambi; vanji lyakwali bizimbangana monyo: “swama kuswama ngondo `ncila va nganda”. Mu ibinda citu ivandi bwakwabu butuba bakulu: “mbuli vanga: wivanga nandi veka? Ve. Nzambi uvanga yawu”. Bwawu, zaba kwaku njye uyekemena kedocikanga banka, ti njye kisi manya ko, mayilu maku misitalanga ku ilu ko, ibila nzila landana.

Bunsi tupodi uzabila ufwa?
Bwinji uzaba ufwa tufwene ntete uzaba uziinga bubote ayi baliyitu. Muna mataanga mwamuna tikuwanga ti “lufwa luzengwa kukangala tuyiza”. Njye wizabanga uziinga mu cintwali i luzolo ayi baliyaku vana kanda, vana bwala, muna `nsenje, kuna ibundu ci isalu? Tomba b’usiila bwinji ucitukwa `nkwa busoonga. Bika bwivi, luvunu, bumpunya, `nsoce, lunangu, bweze, bika cimbene, lulendu, mankundu, lungundayi i manso manka makuvanga usumukwa.
Bwinji ufwa bubote fwene uziinga buna butumina tutumu tu Nzambi ayi insiku nsi ina imbote. Ufwa bubote buna ufwila mu Nzambi i bákana ko muna mavanga maku mabóla omo mitóvwesa banka. Zaba ti Nzambi kayángalalanga ko mu lufwa lu ivanga-mbi, vanji nandi wivyokanga umona nyenze a muna mbalukulu i lukaku lwandi.


Trabalho investigativo
Cabinda, 2 de Novembro de 2010
MBIZI CIMVUNZI




XXXXXXXXXXX
XXXXXXXXXXX
XXXXXXXXXXX
XXXXXXXXXXX
XXXXXXXXXXX




Linkambi-linkambi, nkambika:

1. Awu ti wiza ivubalala, awu ti wiza icoka lilyonga.
2. Sempelele inatina macyo mandi k’isuka.
3. Civinda-vinda kumbusa `nkondo.
4. Njye kwenda muna sola mama nyenya.
5. Mama Bwanga i mwan’andi.
6. Kunmonakesa ko.
7. Muna cyazi cingazi nunga limweka to, yayonso inkese i inkese.
8. Ku ilu dó va si dó.































NSUNDU MANKAMBI
(SOLUÇÃO DAS ADIVINHAS)




Página 7

1. Búku
2. Malelele
3. Ibása
4. Mwisi itimba

Página 15

1. Bintubu
2. Licyo
3. Nzila
4. Uvenda nzungu

Página 17

1. Mamanya
2. Zisina
3. Mbazu
4. Ulaba
5. Meso

Página 18

1. Mabene ma ileze-cyento
2. `Nsoongo
3. Byazi binkuti i bifulukwa...
4. Nzungu saka ina itoka va mbazu
5. Lulaka
6. Matu ma ono babúlwili ikúzu
7. Cyazi cingazi
8. Zinkongo

Página 20

1. `Nsoko liba i liyilu
2. Ntumbu i `nsivu
3. Cimpandi
4. Byazi
5. Civu i `nswa ngazi
6. Mwana mu kati k’ivumu...
7. Ngonda i zimbota
8. Saka i mayaka









INDICE

1- Prefácio
2- Mbazu Lusingu
- Buyíla
3- Luvambanu
4- Cyowa
5- Lizandu
- Itoko ci Meso
6- Ketinisanga Monyo
7- `Ncyento Bwala
8- Kunsi Uswamina?
9- Bungu Lifwana
10 - Ba `Nkandi `Mvimba
11- `Ntoto `Nkuluntu
- Lulendu lu Masumu
12- Nani Ututolomona?
13- Mwana Usumbululu Bantu
14- Luzingu va Kati ku Ntandu
16- Ulongukwa Lyambu
17- Lungundayi
19- Uzaba Uziinga
21- Nsundu Mankambi
22- Indice














ONO WILONGA IMWAMWANA NSI IMVIMBA KILUBULWA

 Comente este texto
 Paralerepensar


Comentário (0)

Deixe um comentário

Seu nome (obrigatório) (mínimo 3, máximo 255 caracteres) (checked.gif Lembrar)
Seu email (obrigatório) ( não será publicado)
Seu comentário (obrigatório) (mínimo 3, máximo 5000 caracteres)
 
Insira abaixo as letras que aparecem ao lado: JSPg (obrigatório e sensível. Utilize letras maiúsculas e minúsculas;)
 
Não envie mensagem ofensiva e procure manter um intercâmbio saudável com o seu correspondente, que com certeza busca dar o melhor de si naquilo que faz.
Seu IP será enviado junto com a mensagem.